2 Tawarikh 3
Naparandukmi Salomo umbangun Banua Kabusungan dio Yerusalem dao buntu Moria, tu Nanii ombo’ PUANG lako Daud, ambe’na, dao inan tu mangka napamanassa Daud, iamotu inan panglulluranna Ornan, to Yebus.
Naparandukmi umbangunni tonna bulan ma’penduan sia allo ma’penduan sia taun ma’penna’pa’na kadatuanna.
Inde sia tu suka’ parandangan nagaragai Salomo la umbangun banuanNa Puang Matua: iatu landona ke direken siku doloi, manangpulo siku na iatu babana duangpulo siku.
Iatu sarambi dio tingo banua pada baba banua tu landona, duangpulo siku na iatu langka’na saratu’ duangpulo siku; anna sapu’i bulaan massang tu lanna lu.
Iatu bilik kapua iato nalopak kayu sendana, anna sapu’i bulaan matasak sia napalakoi passura’ koroma sia pa’rante-rante.
Nabeloimi batu parimata maballo tu bilik iato. Iatu mintu’ bulaan iato, bulaan dio mai Parwaim.
Iatu bilik iato nasapu’ bulaan, iamotu balokna, ampangna, rindingna sia iatu ba’ba patomalinna; na dio tu rindingna nasura’ karubion.
Sia nabangun tu bilik tarru’ maindan; iatu landona pada babana banua duangpulo siku, na iatu babana duangpulo duka siku; nasapu’i bulaan tasak annanratu’ talenta.
Na iatu mintu’ pakunna limangpulo sikele’ bulaan timbanganna. Iatu mintu’ bilik mengkadaoanna nasapu’i duka bulaan.
Lan bilik tarru’ maindan nagaragai tu da’dua karubion, panggaraga dipa’, anna sapu’i tau bulaan.
Iatu mintu’ pani’ karubion duangpulo siku landona; iake misa’ pani’ dio misa’na limang siku, anna sumpu lako to’ rinding banua iato, na iatu pani’ misa’nao limang siku, anna sumpu lako pani’ karubion misa’nao.
Iatu misa’ pani’ karubion ma’penduanna, limang siku landona sia sumpu lako to’ rinding banua iato, na iatu pani’ misa’nao limang siku landona sikande pani’na karubion bunga’na.
Iatu pani’na karubion iate tiballa’ duangpulo siku landona, iatu kalena kelette’ nabendan mentingo tama banua.
Ia tu bannang lango-lango, lango-lango makaseda, karamisi na lenang melo nagaragai kulambu, napale’ke’i dio karubion.
Nagaragai tu da’dua lentong dio tingayo banua, tallungpulo llima siku landona, sia misa’ parande dipatoppo’ dao, limang siku landona.
Nagaragan duka tu pa’rante-rante untikui biringna, napale’ke’ dao tampak lentong sia nagaragan saratu’ bua dalima anna pale’ke’i dio pa’rante-rante iato.
Napabendanmi tu lentong dio tingo Banua Kabusungan, misa’ dio rampe kanan na misa’ dio rampe kairinna, nasangai Yakhin tu dio kanan na Boas tu dio kairi.